Santiago de Compostela, 12 de novembro de 2007.- O conselleiro de Innovación e Industria, Fernando Blanco, informou esta mañá da evolución da implantación da banda larga en Galiza, en base aos obxectivos contemplados polos dous planos postos en marcha en Galiza para a extensión do servizo, a cargo das operadoras R e Telefónica, e no marco do Plano Estratéxico Galego da Sociedade da Información (PEGSI). O conselleiro explicou que a día de hoxe os núcleos de poboación con acceso a banda larga superan os 23.000, o que representa o 77% dos núcleos galegos e o 82% da poboación total do noso país. O titular nacionalista recordou que en 2005 só o 4% do total dos núcleos existentes en Galiza (1.148 de 30.000) contaba con este servizo. Hoxe o 100% dos concellos galegos xa dispón dalgún punto de conexión mediante banda larga no seu territorio e son 78 os núcleos que dispoñen de dobre conectividade (dúas operadoras a escoller), da que en 2005 dispoñían unicamente as sete cidades galegas...